കൊച്ചി: അറുപതു കോടി ഹവാലാപ്പണം സൗദി അറേബ്യയിലേക്ക് കടത്തിയെന്ന പരാതിയില് അങ്കമാലി കേന്ദ്രീകരിച്ചുള്ള പ്രമുഖ വ്യവസായ ഗ്രൂപ്പായ മൂലന്സ് ഇന്റര്നാഷണല് പ്രൈവറ്റ് ലിമിറ്റഡ് കമ്പനി ഉടമകളായ ആറു പേര്ക്കെതിരേ എന്ഫോഴ്സ്മെന്റ് ഡയറക്ടറേറ്റ് കൊച്ചി യൂണിറ്റ് പ്രാഥമികാന്വേഷണം തുടങ്ങി. ജിദ്ദ കേന്ദ്രീകരിച്ചുള്ള സ്പൈസസ് സിറ്റി ഫോര് ഫുഡ് സ്റ്റഫ്സ് വെയര് ഹൗസ് കമ്പനിയില് നിക്ഷേപം നടത്തിയെന്നാണ് പരാതി.
സൗദിയില് വിദേശ മൂലധന നിക്ഷേപം അതാത് രാജ്യത്തെ കറന്സിയായിട്ട് വേണം നടത്താനെന്നാണ് ചട്ടം. ഇവിടെ നിന്ന് 60 കോടി രൂപയ്ക്കുള്ള മൂലധന നിക്ഷേപം മൂലന്സ് സഹോദരന്മാരായ സാജു, ജോസ്, ജോയ് എന്നിവര് ജിദ്ദ കമ്പനിയില് നടത്തിയെന്നാണ് പരാതി. ഇത് തെളിയിക്കുന്ന രേഖകള് ലഭിച്ചതിനെ തുടര്ന്ന് സാജു മൂലന്, ജോസ് മൂലന് എന്നിവരില് നിന്ന് ഇ.ഡി മൊഴിയെടുത്തു. ജോയ് മൂലന് നിലവില് വിദേശത്താണുള്ളത്. ഇവരുടെ ഭാര്യമാരാണ് മറ്റ് ഷെയര് ഉടമകള്. സൗദിക്കാരനായ സ്പോണ്സറുമുണ്ട് ഷെയര്.
വിദേശനിക്ഷേപത്തിനായി 60 കോടി രൂപ കൊണ്ടു പോയത് ബാങ്ക് മുഖാന്തിരമല്ലെന്ന സംശയത്തിലാണ് അന്വേഷണം നടക്കുന്നത്. സൗദി കൊമേഴ്സ് മന്ത്രാലയത്തിലെ കൊമേഴ്സ്യല് രജിസ്റ്ററില് നിന്ന് ലഭിച്ചിട്ടുള്ള വിവരം അനുസരിച്ച് ജിദ്ദ കേന്ദ്രീകരിച്ചുള്ള കമ്പനിക്ക് 2.70 കോടി സൗദി റിയാലാണ് ആകെയുള്ള പ്രവര്ത്തന മൂലധനം. അങ്കമാലിയില് മൂലന്സ് ഇന്റനാഷണല്, മൂലന്സ് ഫാമിലി മാര്ട്ട് എന്നീ സ്ഥാപനങ്ങള് ഇവര്ക്കുണ്ട്. വിദേശത്തും ഇവര് സൂപ്പര്മാര്ക്കറ്റുകളും മറ്റും നടത്തി വരുന്നുണ്ട്.
അറുപതു കോടിയുടെ ഹവാലാപ്പണം സൗദിയിലേക്ക് കടത്തിയെന്ന പരാതി: വ്യവസായ ഗ്രൂപ്പായ മൂലന്സ് ഇന്റര്നാഷണല് പ്രൈവറ്റ് ലിമിറ്റഡ് കമ്പനി ഉടമകള്ക്കെതിരേ ഇഡി അന്വേഷണം തുടങ്ങി