കൊച്ചി: സംസ്ഥാനത്ത് വീണ്ടും നിപ്പ സ്ഥിരീകരിച്ചതില് ഭയാനകമായ സാഹചര്യം നിലവില് ഇല്ലെന്ന് ആരോഗ്യമന്ത്രി കെ.കെ. ശൈലജ. പനി ബാധിച്ച് അഞ്ചു പേര് കളമശ്ശേരി മെഡിക്കല് കോളജിലെ ഐസലേഷന് വാര്ഡില് ചികിത്സയിലാണ്. ഇതില് മൂന്ന് പേര് രോഗിയെ ചികിത്സിച്ച നഴ്സുമാരാണ്. പറവൂര് സ്വദേശിയും യുവാവിന്റെ സഹപാഠിയും ചാലക്കുടിക്കാരനുമായ മറ്റൊരു യുവാവുമാണ് ചികിത്സയിലുള്ളത്. ആരുടെയും നില ഗുരുതരമല്ല. യുവാവുമായി ഇടപഴകിയിട്ടുണ്ടെന്ന് സംശയിക്കുന്ന 311 പേരുടെ പട്ടിക തയാറാക്കിയെന്നും മന്ത്രി വാര്ത്താസമ്മേളനത്തില് പറഞ്ഞു.
നിലവിലെ അവസ്ഥയില് ഭയാനകമായി ഒന്നുമില്ല. വരും ദിവസങ്ങളില് അതീവശ്രദ്ധ വേണം. സ്കൂളുകള്ക്ക് അവധി നല്കുന്നത് സംബന്ധിച്ച് അടുത്ത ദിവസത്തെ സ്ഥിതികൂടി പരിഗണിച്ച ശേഷം തീരുമാനമുണ്ടാകും. അവധി നല്കിയാലും മുന്കരുതല് എന്ന നിലയില് മാത്രമാകും. ആശങ്കപ്പെടേണ്ട സാഹചര്യമില്ല. ബുധനാഴ്ചയും കൊച്ചിയില് തങ്ങി സ്ഥിതി വിലയിരുത്തുമെന്ന് മന്ത്രി പറഞ്ഞു.
അതേസമയം, എറണാകുളത്ത് നിപ്പ സ്ഥിരീകരിച്ച ഇരുപത്തിമൂന്നുകാരന്റെ നില മെച്ചപ്പെട്ടു. യുവാവിന്റെ പനി കുറഞ്ഞു. പറവൂര് സ്വദേശിക്കാണ് നിപ്പ ബാധിച്ചത്. ഉറവിടം സ്ഥിരീകരിച്ചിട്ടില്ല. ഉറവിടം കണ്ടെത്താന് ആരോഗ്യവകുപ്പിന്റെ നേതൃത്വത്തില് പരിശോധനകള് ഊര്ജിതമാക്കി. തൊടുപുഴയിലും,തൃശൂരിലും എറണാകുളത്തും പരിശോധന നടത്തിയെങ്കിലും കാര്യമായ പ്രയോജനം ഉണ്ടായിട്ടില്ല. ഇതിനിടെ, നിപ്പയുമായി ബന്ധപ്പെട്ട് വ്യാജപ്രചാരണങ്ങള് നടത്തിയവര്ക്കെതിരെ എറണാകുളം സെന്ട്രല് പൊലീസ് രണ്ടു കേസ് റജിസ്ററര് ചെയ്തു.