ബംബോലിം: ഇന്ത്യന്‍ സൂപ്പര്‍ ലീഗില്‍ ഒഡിഷ എഫ്.സിയ്ക്കെതിരേ തകര്‍പ്പന്‍ വിജയം സ്വന്തമാക്കി ബെംഗളൂരു എഫ്.സി. ഒന്നിനെതിരേ രണ്ട് ഗോളുകള്‍ക്കാണ് ബെംഗളൂരുവിന്റെ വിജയം. ഒരു ഗോളിന് പിന്നില്‍ നിന്ന ശേഷം രണ്ട് ഗോളുകള്‍ തിരിച്ചടിച്ചാണ് ബെംഗളൂരു വിജയം നേടിയത്.
ബെംഗളൂരുവിനായി ഡാനിഷ് ഫാറൂഖ് ഭട്ടും ക്ലെയിറ്റണ്‍ സില്‍വയും ലക്ഷ്യം കണ്ടപ്പോള്‍ നന്ദകുമാര്‍ ഒഡിഷയുടെ ആശ്വാസഗോള്‍ നേടി.
ഈ വിജയത്തോടെ ബെംഗളൂരു പോയന്റ് പട്ടികയില്‍ അഞ്ചാം സ്ഥാനത്തേക്കുയര്‍ന്നു. 18 മത്സരങ്ങളില്‍ നിന്ന് 26 പോയന്റാണ് ടീമിനുള്ളത്. ഇത്രയും മത്സരങ്ങളില്‍ നിന്ന് 22 പോയന്റുള്ള ഒഡിഷ ഏഴാം സ്ഥാനത്താണ്.
