ന്യൂഡല്ഹി: സൈബര് ആക്രമണങ്ങള് തടയുകയെന്ന ലക്ഷ്യത്തോടെ വ്യക്തികളെ അപകീര്ത്തിപ്പെടുത്തിയാല് 5 വര്ഷം വരെ തടവുശിക്ഷ ലഭിക്കാവുന്ന തരത്തില് പൊലീസ് നിയമത്തില് ഭേദഗതി വരുത്തിയ കേരള സര്ക്കാരിന്റെ തീരുമാനത്തില് ഞെട്ടല് രേഖപ്പെടുത്തി മുന് കേന്ദ്രമന്ത്രിയും മുതിര്ന്ന കോണ്ഗ്രസ് നേതാവുമായ പി.ചിദംബരം. പൊലീസ് ആക്ടില് കൂട്ടിച്ചേര്ത്ത 118എ വകുപ്പ് ജനാധിപത്യ വിരുദ്ധമാണെന്ന ആരോപണം ശക്തമാണ്. ഇതുസംബന്ധിച്ച ഓര്ഡിനന്സില് ഗവര്ണര് ആരിഫ് മുഹമ്മദ് ഖാന് കഴിഞ്ഞദിവസം ഒപ്പിട്ടു.
‘കേരളത്തിലെ എല്ഡിഎഫ് സര്ക്കാര് സമൂഹമാധ്യമത്തിലെ ‘കുറ്റകരമായ’ പോസ്റ്റിന് 5 വര്ഷം വരെ തടവുശിക്ഷ ലഭിക്കാവുന്ന നിയമമുണ്ടാക്കിയതു ഞെട്ടിപ്പിക്കുന്നു. അതുപോലെ അന്വേഷണ ഏജന്സി നാലുതവണ കേസ് അവസാനിപ്പിച്ച് റിപ്പോര്ട്ട് നല്കിയ സംഭവത്തില് (ബാര് കോഴക്കേസ്) പ്രതിപക്ഷ നേതാവ് രമേശ് ചെന്നിത്തലയ്ക്ക് എതിരെ വീണ്ടും കേസെടുക്കാനുള്ള തീരുമാനവും ഞെട്ടലുണ്ടാക്കുന്നു. ഇത്തരം ക്രൂരമായ തീരുമാനങ്ങളെ എന്റെ സുഹൃത്തായ സിപിഎം ജനറല് സെക്രട്ടറി സീതാറാം യച്ചൂരി എങ്ങനെ പ്രതിരോധിക്കും?’- ചിദംബരം ട്വിറ്ററില് ചോദിച്ചു.
Shocked by the law made by the LDF government of Kerala making a so-called ‘offensive’ post on social media punishable by 5 years in prison
— P. Chidambaram (@PChidambaram_IN) November 22, 2020
ഏതെങ്കിലും വ്യക്തിയെ ഭീഷണിപ്പെടുത്തുന്നതിനോ അപമാനിക്കുന്നതിനോ അപകീര്ത്തിപ്പെടുത്തുന്നതിനോ ഉദ്ദേശിച്ച് ഏതെങ്കിലും തരത്തിലുള്ള വിനിമയ ഉപാധികളിലൂടെ ഉള്ളടക്കം നിര്മിക്കുകയോ പ്രസിദ്ധീകരിക്കുകയോ പ്രചരിപ്പിക്കുകയോ ചെയ്യുന്നവര്ക്ക് 5 വര്ഷം വരെ തടവോ 10,000 രൂപ വരെ പിഴയോ ഇവ രണ്ടും കൂടിയോ ശിക്ഷ നല്കാനുള്ള വ്യവസ്ഥയാണു നിയമ ഭേദഗതിയിലുള്ളത്. വാറന്റ് ഇല്ലാതെ കേസെടുക്കാന് കഴിയുന്ന കൊഗ്നിസിബിള് വകുപ്പാണിത്. ആര്ക്കും പരാതിയില്ലെങ്കിലും പൊലീസിനു സ്വമേധയാ കേസെടുക്കാം. അതേസമയം, ജാമ്യമില്ലാ വകുപ്പല്ല.