കോട്ടയം കെവിന് വധക്കേസില് ജില്ലാ പ്രിന്സിപ്പല് സെഷന്സ് കോടതി ഇന്നു വിധി പറയും. കെവിനെ കൊല്ലപ്പെട്ട നിലയില് കണ്ടെത്തിയതിന്റെ 440-ാം ദിവസമാണു വിധി. ദുരഭിമാനക്കൊലയുടെ വിഭാഗത്തില് പെടുത്തിയാണു വിചാരണ പൂര്ത്തിയാക്കിയതെന്ന പ്രത്യേകതയും കേസിനുണ്ട്. തെന്മല സ്വദേശി നീനു ചാക്കോയെ വിവാഹം കഴിച്ചതിലുള്ള വിരോധം മൂലം നീനുവിന്റെ സഹോദരന് സാനു ചാക്കോയുടെ നേതൃത്വത്തിലുള്ള സംഘം തട്ടിക്കൊണ്ടുപോയ നട്ടാശേരി സ്വദേശി കെവിന് പി.ജോസഫിനെ തെന്മലയ്ക്കു സമീപത്തെ ചാലിയക്കര പുഴയില് മരിച്ച നിലയില് കണ്ടെത്തിയെന്നാണു കേസ്. 2018 മേയ് 28നായിരുന്നു സംഭവം.
കെവിന്റേതു മുങ്ങിമരണമോ മുക്കിക്കൊലയോ അതോ ദുരഭിമാനക്കൊലയോ? ദുരഭിമാനക്കൊലയെന്നു കോടതി കണ്ടെത്തിയാല് കേരളത്തിലെ അത്തരത്തിലുള്ള ആദ്യ കൊലപാതകക്കേസായി ഇതു മാറും. ദൃക്സാക്ഷികളില്ലാത്ത കേസില് സാഹചര്യത്തെളിവുകളായിരുന്നു അന്വേഷണസംഘത്തിന് ആശ്രയം. സ്വന്തം പിതാവിനും സഹോദരനും എതിരെ നീനു നല്കിയ മൊഴിയും നിര്ണായകമായി.