തിരുവനന്തപുരം: എല്‍.എല്‍.ബി പരീക്ഷയില്‍ കോപ്പിയടിച്ച സി.ഐക്കെതിരേ നടപടി. പോലീസ് ട്രെയിനിങ് കോളേജ് സി.ഐ ആദര്‍ശിനെ സസ്പെന്‍ഡ് ചെയ്തു. ആദര്‍ശ് കോപ്പിയടിച്ചതായി അന്വേഷണത്തില്‍ കണ്ടെത്തിയിരുന്നു.
തിരുവനന്തപുരം ലോ അക്കാദമി സായാഹ്ന ക്ലാസ് വിദ്യാര്‍ഥിയാണ് ആദര്‍ശ്. ലോ അക്കാദമി ലോ കോളേജില്‍ പബ്ലിക് ഇന്റര്‍നാഷണല്‍ വിഷയത്തിലെ പരീക്ഷയ്ക്കിടയിലാണ് പോലീസ് ട്രെയിനിങ് കോളേജിലെ സീനിയര്‍ ലോ ഇന്‍സ്പെക്ടര്‍ ആദര്‍ശിനെ കോപ്പിയടിച്ചതിനു സര്‍വകലാശാല സ്‌ക്വാഡ് പിടികൂടിയത്. ആദര്‍ശ് ഉള്‍പ്പെടെ നാലുപേരെയാണ് പിടികൂടിയത്.
സംഭവത്തില്‍ പോലീസ് മേധാവി റിപ്പോര്‍ട്ട് തേടിയിരുന്നു. ആദര്‍ശിന്റെ പെരുമാറ്റം പോലീസ് സേനയ്ക്കാകെ കളങ്കം ഉണ്ടാക്കുന്നതാണെന്നും ഗുരുതര വീഴ്ചയാണെന്നും പോലീസ് ട്രെയിനിങ് കോളേജ് പ്രിന്‍സിപ്പല്‍ കെ.ജി. ജോണ്‍കുട്ടി നല്‍കിയ റിപ്പോര്‍ട്ടില്‍ ചൂണ്ടിക്കാട്ടുന്നുണ്ട്.
