അബുദാബി: സ്നേഹമയിയായ അമ്മയ്ക്ക് അന്ത്യ ചുംബനം നല്കാനാകാതെ പിഞ്ചുമക്കള്, പ്രിയതമയുടെ മുഖം അവസാനമായി ഒരു നോക്കു കാണാനാകാതെ ഭര്ത്താവ്, ഇവരെയെല്ലാം എങ്ങനെ സാന്ത്വനിപ്പിക്കണമെന്നറിയാതെ ബന്ധുക്കളും സുഹൃത്തുക്കളും… അബുദാബിയാണ് ആരുടെയും കരളലയിപ്പിക്കുന്ന രംഗങ്ങള്ക്ക് സാക്ഷിയായത്. പത്തനംതിട്ട കോഴഞ്ചരി പേള് റീന വില്ലയില് പ്രിന്സി റോയ് മാത്യു(46)വിനെ ഉറ്റവര് അന്ത്യ യാത്രയാക്കിയത് കാണാമറയത്തുനിന്ന്.
അബുദാബി ഇന്ത്യന് സ്കൂളിലെ ഇംഗ്ലീഷ് അധ്യാപികയായ പ്രിന്സി ബുധനാഴ്ചയാണ് കോവിഡ് ബാധിച്ച് മരിച്ചത്. ഇന്നലെ ഉച്ചയ്ക്ക് തന്നെ അവരെ അബുദാബിയില് സംസ്കരിച്ചു. യുഎഇ കോവിഡ് 19 പ്രോട്ടോകോള് അനുസരിച്ച് കൊറോണ വൈറസ് ബാധിച്ച് മരിച്ചവരുടെ മൃതശരീരം എത്ര അടുത്ത ബന്ധുക്കളെയും കാണിക്കാന് പാടില്ല. അതുകൊണ്ട് തന്നെ പ്രിന്സിയുടെ ഭര്ത്താവ് റോയ് മാത്യു, സ്കൂള് വിദ്യാര്ഥികളായ മക്കള് സെറിള് സാറ മാത്യു, റയാന് സാമുവല് മാത്യു, സിയാന് ജേക്കബ് മാത്യു എന്നിവര്ക്കും അവസാനമായി കാണാന് ഭാഗ്യമുണ്ടായില്ല.
പ്രിയതമയെ സംസ്കരിക്കാനായി മോര്ച്ചറിയില് നിന്ന് ആംബുലന്സില് കയറ്റി കൊണ്ടു പോകുന്നത് അകലെ നിന്ന് കാണാന് മാത്രമായിരുന്നു റോയ് മാത്യുവിന്റെയും ബന്ധുക്കളുടെയും മറ്റും വിധി. മക്കള് മൂന്നു പേരെയും മോര്ച്ചറിയുടെ അടുത്തേയ്ക്ക് കൊണ്ടുവന്നിരുന്നില്ല. അവര് വീട്ടില് ബന്ധുക്കളുടെ കൂടെയായിരുന്നു. അബുദാബി മാര് തോമാ പള്ളി മുസഫ-1 പ്രയര് ഗ്രൂപ്പ് അംഗമായ പ്രിന്സി റോയ് മാത്യുവിന്റെ വിയോഗം ഏവരെയും ഏറെ ദുഃഖത്തിലാഴ്ത്തിയിരുന്നു.