ന്യൂയോര്‍ക്ക്: യുഎസിലെ മലയാളി സംഘടനയായ ഫെഡറേഷന്‍ ഓഫ് മലയാളി അസോസിയേഷന്‍സ് ഓഫ് അമേരിക്ക(ഫോമ)യും അംഗ സംഘടനകളും കോവിഡിന്റെ അതിരൂക്ഷ വ്യാപനത്തില്‍ പ്രതിസന്ധിയിലായ സംസ്ഥാനത്തെ സഹായിക്കുന്നതിന്റെ ആദ്യ ഘട്ടമെന്ന നിലയില്‍ നല്‍കിയ സഹായം കേരളത്തിലെത്തി. പത്ത് വെന്റിലേറ്ററുകളും അഞ്ഞൂറ് പള്‍സ് ഓക്‌സി മീറ്ററുകളും ഉള്‍പ്പെടെ ഒന്നരക്കോടി രൂപയുടെ ജീവന്‍ രക്ഷാ ഉപകരണങ്ങള്‍ ഇന്നു പുലര്‍ച്ചെയുള്ള എമിറേറ്റ്‌സ് വിമാനത്തിലാണ് അമേരിക്കയില്‍ നിന്നും തിരുവനന്തപുരത്ത് എത്തിയത്.
കോവിഡ് പ്രതിസന്ധിയിലുള്ള കേരളത്തിന് കൈത്താങ്ങാകുകയെന്ന ലക്ഷ്യത്തോടെ ആരംഭിച്ച ‘ഒറ്റക്കല്ല, ഒപ്പമുണ്ട് ഫോമാ’ പദ്ധതിയുടെ ഭാഗമായാണ് ഇവ നാട്ടിലെത്തിച്ചത്. സഹായത്തിന്റെ രണ്ടാം ഘട്ടത്തില്‍ ബ്ലാക്ക് ഫംഗസിനെതിരെയുള്ള മരുന്നുകളും സര്‍ജിക്കല്‍ ഗ്ലൗസുകളും കൂടുതല്‍ വെന്റിലേറ്ററുകളും ഉള്‍പ്പെടെയുള്ളവ കേരളത്തിലേക്ക് എത്തിക്കുമെന്ന് ഫോമ പ്രസിഡന്റ് അനിയന്‍ ജോര്‍ജ് അറിയിച്ചു.
