പാമ്പാടി: പൊത്തന്‍പുറം ബ്ലോസം വാലി സ്‌കൂള്‍ ഓഫ് എയ്ഞ്ചല്‍സില്‍ മോഷണത്തിന് എത്തിയ യുവാവ് നിരീക്ഷണ ക്യാമറ അപഹരിച്ചു കടന്നു കളഞ്ഞു. സെന്റ് ഇഗ്‌നാത്തിയോസ് പള്ളിയോടു ചേര്‍ന്നു പ്രവര്‍ത്തിക്കുന്ന സ്‌കൂളില്‍ സ്ഥാപിച്ചിരുന്ന ക്യാമറകളില്‍ 1 എണ്ണം ആണ് മോഷ്ടാവ് അപഹരിച്ചത്. 4 ക്യാമറകളാണ് ഇവിടെ സ്ഥാപിച്ചിരുന്നത്.
2 ക്യാമറകള്‍ മുകളിലേക്ക് തിരിച്ചു വച്ച നിലയിലാണ്. ചെറുപ്പക്കാരന്‍ ആയ മോഷ്ടാവ് മുഖം മൂടി ധരിച്ചാണ് എത്തിയത്. ഈ ദൃശ്യങ്ങള്‍ എല്ലാം ക്യാമറയില്‍ പതിഞ്ഞു ലഭിച്ചിട്ടുണ്ട്. ഇത് സഹിതം പൊലീസില്‍ പരാതി നല്‍കി. പിറകില്‍ ബാഗ് ഉള്‍പ്പെടെ ധരിച്ചാണ് മോഷ്ടാവ് എത്തിയിരുന്നത്.
കഴിഞ്ഞ ദിവസം രാത്രി 8 മണിയോടെയാണ് സംഭവം. മാസങ്ങള്‍ക്കു മുന്‍പ് സ്‌കൂളില്‍ മോഷണ ശ്രമം നടന്നിരുന്നു. സ്‌കൂളിന് അകത്തു കയറിയ മോഷ്ടാവ് വാതിലുകളും അലമാരകളും തകര്‍ത്തിരുന്നു. ഇതേ തുടര്‍ന്നാണ് സ്‌കൂളില്‍ നിരീക്ഷണ ക്യാമറ സ്ഥാപിച്ചത്. പഴയ കേസില്‍ അന്വേഷണം നടന്നു വരുന്നതിനിടെയാണ് വീണ്ടും മോഷണ ശ്രമം അരങ്ങേറിയത്.
