കോട്ടയം: സമൂഹ മനസ്സാക്ഷിയെ ഞെട്ടിച്ച കെവിന് വധക്കേസില് വിധി പറയുന്നത് ഈ മാസം 22ലേക്ക് മാറ്റി.കോട്ടയം പ്രിന്സിപ്പല് സെഷന്സ് കോടതിയാണ് കേസിന്റെ വിധി പറയാനായി 22ലേക്ക് മാറ്റിവെച്ചത്.കെവിന്റേത് ദുരഭിമാനക്കൊലയാണോ എന്ന കാര്യത്തില് നടന്ന വാദമാണ് വിധി മാറ്റാന് കാരണമായത്.
കെവിന് താഴ്ന്ന ജാതിയില്പ്പെട്ടയാളാണെന്ന് കേസിലെ മുഖ്യ സാക്ഷി ലിജോയോട് ഷാനു പറഞ്ഞിരുന്നു.അതുകൊണ്ട് തന്നെ കെവിന്റേത് ദുരഭിമാനക്കൊലയാണെന്നും അപൂര്വങ്ങളില് അപൂര്വമായ കേസെന്നുമാണ് പ്രോസിക്യൂഷന് വാദിച്ചത്.അതേസമയം, കെവിന്റേത് ദുരഭിമാനക്കൊലയല്ലെന്നും ഒരുമാസത്തിനകം വിവാഹം നടത്തിക്കൊടുക്കാമെന്ന് നീനുവിന്റെ അച്ഛന് ചാക്കോ പറഞ്ഞിരുന്നതായും ഇരുവിഭാഗവും ക്രിസ്ത്യാനികള് ആയതിനാല് ദുരഭിമാന കേസ് ആവില്ലെന്നാണ് പ്രതിഭാഗം പറഞ്ഞത്. ഇതോടെയാണ് ഇക്കാര്യത്തില് വ്യക്തത വേണമെന്നാവശ്യപ്പെട്ട് വിധി പറയാന് മാറ്റിയത്.
ആറ് മാസത്തിനകം കേസിന്റെ വിചാരണ പൂര്ത്തിയാക്കാന് ഹൈക്കോടതി നിര്ദേശിച്ചിരുന്നെങ്കിലും മൂന്നു മാസത്തിനുള്ളില് വിചാരണ പൂര്ത്തിയാക്കിയാണ് വിധി പറയാനൊരുങ്ങിയിരിക്കുന്നത്.