കോഴിക്കോട്: അതിഥി തൊഴിലാളികളെ നാട്ടിലെത്തിക്കുന്നതിന്റെ ഭാഗമായി കോഴിക്കോട്ട് നിന്നും കണ്ണൂരില്‍ നിന്നുമടക്കം അഞ്ച് ട്രെയിനുകള്‍ ഇന്ന് പുറപ്പെടും. കോഴിക്കോട് നിന്ന് ബിഹാറിലെ പട്‌നയിലേക്കാണ് ട്രെയിന്‍. തൊഴിലാളികളെ റെയില്‍വേ സ്റ്റേഷനിലെത്തിക്കാനുള്ള നടപടി ക്രമങ്ങള്‍ പൂര്‍ത്തിയാക്കി വരികയാണ്.
ജില്ലയുടെ വിവിധ ഭാഗങ്ങളിലെ ക്യാമ്പുകളില്‍ കഴിയുന്ന 1200 അതിഥി തൊഴിലാളികളാണ് ബിഹാറിലെത്തിക്കുക. കഴിഞ്ഞ ദിവസം റാഞ്ചിയിലേക്ക് 1175 യാത്രക്കാരുമായി മറ്റൊരു ട്രെയിന്‍ പുറപ്പെട്ടിരുന്നു. ഇന്ന് വൈകീട്ട് മൂന്നിനാണ് ട്രെയിന്‍. രണ്ട് മണിയോടെ പരിശോധനകള്‍ പൂര്‍ത്തിയാക്കി കെ.എസ്.ആര്‍.ടി.സി ബസുകളില്‍ ഇവരെ റെയില്‍വെ സ്റ്റേഷനില്‍ എത്തിക്കും.
കോഴിക്കോടിന് പുറമെ കണ്ണൂര്‍, തൃശൂര്‍, എറണാകുളം ജില്ലകളില്‍ നിന്നാണ് മറ്റ് ട്രെയിന്‍ സര്‍വീസുകള്‍. കണ്ണൂരില്‍ നിന്ന് അഞ്ച് മണിക്കാണ് ട്രെയിന്‍. 1230 അതിഥി തൊഴിലാളികളെയാണ് കൊണ്ടുപോവുക. തൃശൂരില്‍ നിന്ന് ബിഹാറിലെ ദര്‍ഭംഗയിലേക്കാണ് ട്രെയിന്‍. ഇന്ന് വൈകിട്ട് അഞ്ചിനാണ് തൃശ്ശൂരില്‍ നിന്ന് പുറപ്പെടുക. 1200 പേരെ കൊണ്ടുപോകാനാണ് തീരുമാനം. എറണാകുളത്ത് നിന്ന് ഇന്ന് രണ്ട് ട്രെയിനുകളാണ് ബിഹാറിലേക്ക് പുറപ്പെടുക. എറണാകുളം സൗത്തില്‍ നിന്ന് ഉച്ചക്ക് രണ്ട് മണിക് ശേഷവും ആലുവയില്‍ നിന്ന് വൈകീട്ട് മൂന്ന് മണിക്കുമാണ് ട്രെയിന്‍ പുറപ്പെടുക.
