കുവൈത്ത്: കബദ് മേഖലയിലെ ജനവാസ കേന്ദ്രത്തില്‍ അലഞ്ഞുനടന്ന സിംഹത്തെ അധികൃതര്‍ പിടികൂടി മൃഗശാലയ്ക്കു കൈമാറി. കൂടുവിട്ടിറങ്ങിയ വളര്‍ത്തുസിംഹമാണെന്നാണു നിഗമനം. സിംഹം അലഞ്ഞുനടക്കുന്നതായി വിവരം ലഭിച്ചയുടനെ കുതിച്ചെത്തിയ സുരക്ഷാ വിഭാഗം പിടികൂടുകയായിരുന്നു.
ഉടമയെ കണ്ടെത്താനുള്ള ശ്രമം ആരംഭിച്ചിട്ടുണ്ട്. സിംഹംപോലെയുള്ള വന്യജീവികളെ വളര്‍ത്തുമൃഗമാക്കരുതെന്നാണു നിയമം. അതു ലംഘിച്ചതിന് ഉടമയ്‌ക്കെതിരെ നടപടിയുണ്ടാകുമെന്നും അധികൃതര്‍ അറിയിച്ചു. മൂന്നു വര്‍ഷംവരെ തടവും 50 ദിനാര്‍ പിഴയും ശിക്ഷ വിധിക്കാവുന്നതാണ് ഇത്തരം മൃഗങ്ങളെ വളര്‍ത്തുമൃഗങ്ങളാക്കിയാലുള്ള കേസ്.
